Si mi riciti ca la musica jeni a stissa
vi vuogghiu fari primu 'sta primissa:
lu mutivu siddu jò scrivu è unu sulu,
p'arricammiari li pigghiati pi lu culu.

Pi la Sicilia rui casinò cu jè già rissi
ca a Taurmina e Cifalù idda i facissi
sunnu ru cuosi a vuolu r'acchiappari
masinò cuomu un cuccu pò arristari.

Uora pinsati pi Cifalù ri quantu vali
ri putiri vantari lu casinò municipali
e siddu puoi u vulissimu cchiù bellu
o scanciu ru casinò fari un burdiellu

ca puoi ci putissi macari jò abbarari
e dd'accussì a finissi ri cugghiuniari,
ci mittissi lu beddu Tuninu pi crupiè
o scanciu r'acchiappari a ccu jè gh'jè.

Quannu ci avieva pinsatu jò ri farlu
mi rissiru: ma vattinni a Munticarlu!
Aviennu a purtata ri manu un casinò
pi gh'jucari a lu putijnu 'un gn'jssi jò.

Sunnu tri anni c'aspiettu u ricissietti
quannu lu putissi puntari 'nte rulietti
'nvieci ri jrimi a manciari la cassata
'nta lu casinò mi facissi a mè jucata.

Ma sugnu 'ndicisu ca 'nta lu casinò
si pò scancillari l'accientu 'nta la O,
'nfatti mi rissiru: ccà jò già cci l'aju
ri quannu l'accientu ri 'nta O livaju;

parinu fissarì ma sunnu cuosi vieri
e jò fussi famusu a pparu ri Ranieri.
Taliannu com'è arridduttu 'stu paisi
fussi buonu pi cummigghiari i spisi

a ca si i suordi 'un l'arricuogghiu jò
ci vulissiru ru burdielli e un casinò,
'un ci fussi cchiù bisuognu ri pulisi
pi pavari lu mari ri diebiti e cuntisi,

u viriti tutti a quali puntu mi purtaru
a scafazzari jacqua rintra lu murtaru,
jò 'n cunsigghiu la vulissi già purtari
'sta mè prupuosta pi farila appruvari

ma iddi m'arripinninu ca fui 'mpuosta
e m'agghiuttiri puru stautra suppuosta,
macari 'un m'accusinu ri suppunienza
ma ri sicuru pi suppuosta dipinnienza.

Ma jò u sacciu ca mi pigghinu pi fissa
e di ruminica 'mprummittiu nnà missa
pi lu Baruni 'nto castieddu Burdunaru
ca cuomu nnà pinnula si l'ammuccaru.

C'è 'n tantu a pruova ca ci l'aju 'mpintu
e nnà piecuriedda riturnò 'nta lu ricintu
'nsiemi a Tuninu diciriemmu r'aspittari
jè sulu nnà custioni ri juorna ri cuntari.

Avannu jeni a ll'insigna ru Pantucraturi
'ntra juorna puru a fiesta ri lu Sarbaturi
siddu suordi jò 'un gn'jssi accampannu
sparassimu sulu un mascu a capurannu.

St'annu quantu turisti! Pi ddì mischini,
c'allampinu additta sienza li bbanchini
co tassa ri suggiornu ci vuosi accattari,
cuomu riri: ra casa vi putieviru purtari!

Ma quannu piensu jò a ll'amicu Pippu
a ca 'n tutti li cuosi cci fici fari u lippu
mi sbattissi sta mè tistuzza mura mura
p'un fari puru cu iddu 'sta mala fivura.

Si lamientinu a ca jò pigghiu ri 'n susu
e ca ogni gh'juornu fazzu u prisuntusu
jò m'appinnissi la mazzira 'nto cuoddu
'nvieci ra fascia e mi jttassi a muoddu.