C'aviemu un cifalutanu 'nta la luna
rumani u sinnicu a nutizia nni runa,
la nuvità sù gh'juorna chi s'aspietta
pi sapiri a ccu 'ntistari la scupierta,

r'urgienza si riunjù a cummissioni
vattiannula: u mari ri la cunfusioni,
ri chiddu ra tranquillitati a llimitari,
manca sulu la banniera r'appizzari.

Pi porumani jè pruonta l'urdinanza
pi rifurniri ri jacqua la citatinanza,
a ll'uottu 'n puntu arriva la navietta
e pi chidd'ura attuppati i rubinietta.

Stabiliemmu pi du cursi 'nta jurnata
r'acqua abbunnanti rata e ddipurata,
datu ca uora 'nta luna aviemu u mari
già putiemu i quattru fasci eliminari,

puoi pigghiu l'appiessi e la surgienti
e li mannu a fari 'n culu sienza nienti
cci fazzu fari jò li cunti sienza l'uosti
stimpagnannici 'nta facci li rispuosti.

'N tantu ccà li prubliemi sunnu tanti
ca nni passò puru Puoddina r'avanti
picchì mientri nuautri siemu 'n stallu
iddi si ficiru lu municipiu ri cristallu

si rapieru macari un situ 'nta jù tubbi
e ccà ancuora jamu avanti cu tri tubi;
si sugnu cu l'autri sinnici a cunfruntu
'un dicu ca mi scantu, ma m'affruntu.

Jò appizzu 'nta mè puorta a rattaluora
vistu c'aju un pieri rintra e unu fuora,
'un viru cchiù pi mjà nudda sarvizza
jò pinsava svurricannu 'nta munnizza

chista jè l'ultima chi m'attuccò ri fari
pi putiri ammienu la facci jò sarvari,
u sapiti chi ci truvai, ma mienu mali!
I fivurieddi ra mè campagna litturali!

Tutti strati sunnu uoramai sputtusati
ca si pò fari nnà piantagiuni ri patati,
ma cu si svuota u pieri jò lu chianciu
faciennu lu diebitu fuora ru bilanciu.

Si satu ri la patiedda caru 'nta la braci
pi curpa ri 'sta ran maniata r'incapaci
ognerunu tira siempi o sò cummientu
priricannu ca pi Cifalù jeni lu 'ntientu.

'Un capiscinu mancu quantu spirienza
ci miettu pi fari 'ntuntariri a minuranza
ca trasinu cuomu i pumatusi e Capriati
e puoi niescinu cuomu cani vastuniati.

Vieru jeni ca aju l'appuoggiu ri Tuninu
beddu, cu ddà varba cuomu un fivurinu,
nuautri siemu ri Santu Mauru e di Janci
e ccà stamu faciennu ririri a cu chianci.

Fazzu un sautu o cantieri ri lu puortu
e puoi v'aggiustu ddù binariu muortu
siddu ra parti ri Missina l'à stagghiari
o siddu ra latata Paliermu l'à llungari,

'nto clabbi c'jeni pruonta a maschiata
e cu lu tagghiu ddà passa nnà jurnata,
'un sacciu cuomu à spartiri lu tiempu
primu chi cuntrarijtà pigghinu campu

'un aju lu tiempu ri lieggiri i sintienzi
e pigghiarimi un gn'juornu ri vacanzi,
ci sù li pumpieri c'un vannu 'n azioni
picchì m'aspiettinu pi l'inaugurazioni.

Jò staju 'mpignannu tuttu 'nto Palazzu
tantu a la fini puoi pava cappiddazzu,
avantieri mi vinniju puru i prisantuna
chi m'annu parsu siempi ru piantuna,

e mientri jttava ru pirati 'nta lu cursu
sintiu co tarri m'abbullaru lu rricursu,
mancu jappi tiempu ri pigghiari ciatu
ca sugnu ri vai arrieri cummigghiatu,

cu 'sta catunia ri 'sta casa ri li Puosti
cu chista m'agghiuttutu ru suppuosti
'un capiti ri quantu a mjà m'abbrucia
ca mancu ri Tuninu aju cchiù firucia.

Allura cu la mè tiesta vaju nn'arrieri
pinsannu a quannu jera cunsigghieri
chi tienieva siempi jsata 'sta tistuzza
p'un sientiri ri mè pieri la ran puzza.