Sunnu assai li prugietti e li cantieri
ca ri scriviri puisij sugnu nn'arrieri,
a farli cchiù curti già staju pinsannu
ma puru accussì scrivu tuttu l'annu;

'un siervi 'nciegnu e mancu fantasia
pi cuntari nzacchi succieri 'n puisia,
a lavuornia chi circula è 'mpurtanti
e vi la vuogghiu cuntari siruta stanti.

Liggìu avant'ieri 'nta la stampa lucali
un cumunicatu r'impurtanza mundiali
rittu 'n paluori è d'attupparisi l'aricchi
e ppi mmiraculu 'un appi li stinnicchi.

Rici ca lu puliticu vieru mai si pienti
e cuomu u scieccu ri sienia và avanti;
'stu riscursu l'avieva sintutu a Musca
ri unu ca rintra a tiesta avieva ciusca.

Rici ca curpa jè siempi ri l'autri gienti
e ca lu puliticu a fini 'un cientra nienti
o chi javi a varba o puru u muschittuni
e, s'un ci cririti, 'nfurmativi o Cumuni.

'N tantu u cunsigghiu jè già paralizzatu
picchì Tonuzzu 'un si vò miettiri ri latu,
ratu ca all'uppusizioni cchiù 'un ci jarba
ri scanciarici lu muschittuni pi la varba.

Jeni 'n ballu lu prisirienti ru cunsigghiu
chi cumunicò a la stampa stu ritagghiu,
a mmuoru r'iddu cuomu 'n chiarimientu
pi ciarmari 'n tuttu u paisi lu scuntientu.

Fui nnà tanca ri binzina 'n capu u fuocu
e 'n sala ri Capriati ci fui u juocu fuocu;
sinnicu e giunta si mittieru 'n maschira,
a gienti 'nto suonnu ci trimaru i trispita.

'Mpustati arrieri li vancuna cu ddì facci
mascariati, chi pinni 'n tiesta e li friecci
appizzutati, assuppati 'n punta ri vilieni
ca mancu i canuscinu ancuora l'indiani;

'n tiesta a li schieramienti u ranni capu
chi pinni cchiù longhi picchì è lauriatu.
Mi vieni ri lu cuori, e jò cci ricu allura:
aunni 'un c'jeni umilitati 'un c'è cultura.

Quannu cci piensu pierdu la pacienzia
picchì sulu ri munnizza c'è bunnanzia,
ma jò 'un duvissi a li pulitici 'nsignari
cuom'annu a ffari p'un paisi cuvirnari.

Scinniri 'n pulitica jeni rispunsabilitati
e 'un nnu puonnu fari i tiesti svacantati
c'un capiscinu mai ri jessiri a ssirviziu
pi putiri rari a li pupulazioni binifiziu.

Uoggi puru u vantu ri la nuostra gienti
siddu 'un sunnu 'gnuranti sù puliticanti
e siddu c'è coccunu chi puliticu si criri
a 'mpararisi stu mistieri si nn'ava gh'iri.

Ognerunu javi li sò spirazioni e l'idiali
ma 'un n'ava cacari mai fuora ru rrinali
cu jappi lu mannatu ri la rapprisintanza
ri tutti li cieti e ll'idiali ri la citatinanza.

Siemu tutti già cumminti ca 'n sustanza
rieci fantasimi cci sù 'nta maggiuranza,
cuosa r'un ci cririri, ma tantu jeni vieru,
c'appruvaru lu rigulamientu o cimitieru.

E siccuomu già ri vai nn'aviemu tanti
accussì jamu nn'arrieri e no nn'avanti,
sicutati ancuora a pigghiarini pi ffissa
cuomu u parrinu ca prierica 'nta missa.

U viriemu ca vossjà 'un si pò accurdari
quannu pi cumunista lu fannu risurtari,
ma 'un c'è bisuognu ca nni fà u cumiziu
nn'ava mustrari ca jè a nuostru sirviziu.

A gienti 'un siervinu i prisirienti lauriati
picchì prutienninu sulu ri jessiri ascutati
'stu stissu riscursu vali pi li cunsigghieri
r'ascutari tutti li pirsuni c'hannu r'arrieri.

Siddu u sinnicu cc'javi lu frati difinsuri
appiena chi 'nsuorgi quacchi ddissapuri,
picchì vossjà ci runa a cuorda pi parrari
e 'un ci runa u ciucciu 'n vucca ri sucari?