- Pippinu, ma nnu vò riri picchì tistij … mi pari cuomu fussi anticchia suddiatu.
- Mah! chi và ddiri, mi vinisssi ri rririri e di chianciri, c'à ffari, u sapiti cuomu sugnu, no?
- Rricu, 'un nnu sai ca Pippinu parra picca. Tu l'à capiri a vvuolu, tistija ma jeni cuomu siddu nni vulissi far'accapiri ca siemu mali cumminati; ma signuri mè! cuomu nni jù a finiri, 'un ci puotti nienti … app'à jessiri picchì app'à jessiri! o mi vulissiru riri c'ancuora 'un vinn'aviti addunatu ca falliemmu, falliemmuuuu …! 'nca uora, cu avieva cocchi cusuzza mittuta ri latu si pò stujari u musu; picchì jò u sacciu, l'aumienti uora arrivinu cuomu l'arannuli, a mpruvvisata … ma chi fui ristinu ri 'stu paisi …! 'un ci puotti nuddu scunciuru, 'un ci puotti!
- Cci avissi vulutu patri ron Turi, sulu iddu l'avissi pututu sbrugghiari 'sta marriedda; jò, pi rrispiettu a ll'armuzza sjà, 'un l'à rittu mai a nuddu ma viriti ca chiossai ri nna vuota jò u vitti cu ppruova e ccu ll'uocchi mè, aunni iddu passava a stuola abbastava ca unu cci appricava tutta a sò buona ntinzioni e iddu ti canciava e scanciava la colunqui … a ca unu arristava co vucca apierta.
- Si …! e puoi pi chiurila, chi cci vulieva n'autru scunciuru? Nvieci, jò ricu ca ci fui sbagghiu. O si sbagghiaru o Municipiu, picchì nnè ca jeni a prima vuota, o puru, 'un po' jessiri ca si sbagghiaru a Cassazioni? nuddu jè nfallibili ri 'sti tiempi! Jò m'arrivuordu ca nna vuota a nuotti ri Capurannu, 'nta cammira 'e valantuomini jucavinu o bacarà, tuttu 'nta nna vuota Fulippu Piricuddu pigghia, si susi e ssi nni và. Si vuota Saru Lapa … Fulippu, aunni vai? aunni và, 'un nnu viri ca falliù …! arrispunnjù ron Giuvanninu Citranu. Cu 'sta parabbula u capiti nzacchi ntiennu riri? ca tannu cc'jera ammienu a ddignitati ri spiccicarisi u culu ra sieggia 'o mumientu giustu … uora!! mancu si vieni Djò!
- Nicuola, jò ricu c'addimintasti cuomu i sparrittieri ra Jurieca, e mmienu mali ca nascisti e criscisti 'nta strata Agnieddi, aunni abitavinu tanti uomini ri liggi, picchì masinò …! matri mjà, mancu cci vuogghiu pinsari, cca rintra fussimu 'nto nfiernu juornu e nuotti.
- Ascuta Pippinu, scusa s'arripigghiu arrieri 'stu riscursu, ma mi ricieva Rricu, c'avant'assira quannu si sintieva tutta dda cunfusioni 'n tiesta, primu ri jri o tiatru a vviriri a Turnaturi, tu cci rasti nnà pinnula … cuomu chissi chi si usinu uora, nnè ca fui pi chissa ca jappi tutti dd'allucinazioni?
- Ma quannu mai! chininu jera … jò u canusciu a Rricu, a vista l'avi ancuora buona, e quannu cci viennu – cuomu t'à ddiri – ddi cincu minuti ri scarrichi urmunali … 'un nni po' ffari a mmienu, iddu siempi r'accussì à statu, addimienta nn'ancidda e 'nta ddi mumienti 'un c'jeni nuddu cu po' trattieniri. Cci rissi, và ò saluni nni Furcu e ti fà appizzari ru mignatti … jò u vitti ca cuomu prissioni l'avieva javutulidda, ma 'un mi vuosi ascutari, ò suolitu r'iddu; jò cu chininu e u sali nglisi curai tutta Cifalù e 'un si lamintò mai nuddu. Pippinu Maggiuri, vi l'arrivurdati, no? Chiddu … u sapievinu tutti, jera valienti ma anticchiedda curiusu, una 'un nna sbagghiava! ma vai siddu a coccunu su mittieva 'nta nasca o puru chi cci facieva antipatjà, l'uogghiu ri riggiu cci l'abbuccava cu mutu … cuomu chiddu buonu e mmuortu aunn'è. Nicuola, 'n cunfirienza, chi t'à ddiri, ca certuni pi ffuorza r'abbitutini puru ri mjà u vulievinu ancuora scrittu … cuntienti iddi!
- Tu mi vulissi riri ca cci avievinu pigghiatu palatu o jera picchì … javinu miegghiu?
- Oh! m'ancuora ri 'sti minchiati aviti a parrari? Jò u lavannu cu l'acqua ri marba mi facieva …!
- Ma picchì cca rintra ri chi ccuosa parrinu, aviti sintutu parrari mai ri jautri cuosi?
- 'Un nnu viriti ca mancu s'usinu cchiù e ancuora parrati ri purghi … ca siddu uoggi jti nnè spizziala e cci addumannati l'uogghiu ri riggiu, u sali nglisi, u citratu magniesia o puru u chininu, arriestinu allampati ma 'un si runinu, e chi fannu? accumienzinu a circari rintra tutti i casciuna e casciuniedda e puoi vi ricinu ca finieru o puru ca 'un nni passinu cchiù, picchi? p'un fari malifivuri.
- Pippinu, javi chi ti l'à dumannari – m'à parsu siempi lariu – ma mu vò riri u picchì i ricietti vuautri duttura i scriviti 'n muoru c'un si puonnu capiri, m'ammienu vuautri i capiti?
- 'Nca ciertu, ci mancassi jautru!
- Rricu, ammienu cu iddi, puru ca unu 'nta ricietta 'un ci capisci nienti siddu và nni nautru dutturi o nno spiziali, s'à firinu a lieggiri nzacchi cc'è scrittu, picchì chiddu ch'è scrittu è scrittu.
- Mah! uora pari ca si mittieru a tiesta a puostu, jè giustu ca nzacchi scrivinu l'hannu a putiri lieggiri tutti, macari chiddi c'un sunnu tant'allittrati. A cuosa c'un mi cabbizza, nvieci, a sai qual'è? a ca uora 'un nni capiemu cchiù 'nto parrari … uncà pigghia i pulitici, tu i capisci a iddi quannu parrinu?
- Accussi … a ssatari a ssatari, cuomu piccasu … chi t'à ddiri, nfrastrutturi, rifuormi, criscita, crisi, travagghiu, disuccupazioni, cassa ntigrazioni, birlusconi, vutazioni, curruzioni, riestra, sinistra, cientru, cintrinu, cintruzzu … cci vuoli nn'anticchia r'appricazioni, pacienzia e buona vuluntà!
- Nicuola, ma chi vvà circannu allura, 'ntra i mmiragghi chi jaj e 'stu gran sapiri, scinni 'n campu. Jò sugnu sicuru ca tu jaj mpiegnu e cumpitienza p'acchianari a primu cuorpu … ascutimi!
- Sii …! 'n pararisu! nvieci, Pippinu, a prupuositu ri mmiragghi, picchì 'un nni fai viriri l'autra facci ra mmiragghia? ntiennu riri – 'n siensu mitafuoricu – picchì 'un nni cunti cocchi cuosa tu ri pulitica, ciertu a ca cci nn'hai ri cuntari … vuliennu, si ntienni!
- Nicuola, 'un mi fari stranutari! a mmjà nna fascia mi rurò coccu trient'anni, ca mancu jò ci piensu cchiù e quannu scinnìju l'avieva – m'à ccririri – ancuora nova nova e mmaculata; ddu spinguluni ancuora jera lucienti, picchì jò u tinieva siempi ammienzu a pruvigghia, chi ti pari a ca jera cuomu uora, ca a ffuorza ri livari e miettiri, duoppu rui tri anni l'hannu tutta luorda e sculuruta.
- Pippinu giustu rici, tannu nnè ca c'ierinu tutti i cirimmunij chi ci sunnu uora … nnaugurazioni, cuncierti musicali, rapprisintazioni, ncuontri ntirnaziunali, fiesta ru pisci azzurru, ra pasta a tajanu, ru gilatu ri ficurinia, ra cuozza viraci, ru pani e panielli, ri sfinciuna ri san Giusieppi, ri cipuddi ri jardinu ranni, ra fasuola munachiedda … e mi fiermu ccà, picchì 'un vi vuogghiu stunari a tiesta cu tuttu 'stu mari ri mpiegni e dd'appuntamienti stituziunali chi jannu uora; tannu a fascia si niscieva ri 'nto casciuni, si pò ddiri ca nna vuota l'annu, pa pricissioni ru Sarbaturi, ca jaju ancuora 'nte naschi ddu fietu ri naffittalina chi gh'java lassannu pi strati strati e puoi si sarbava; ma mu vuliti riri tannu cu l'avieva a nchiappari? si putieva pigghiari ri camula … e allura tè, cafuddavinu naffittalina.
- Rricu, parri parri, o puru tu scurdasti com'iera tannu a fascia? Spijci a Pippinu, com'iera.
- Com'iera … ri tri culura …! o no? Pippinu, 'un cugghiuniari. Nicuola s'un mi sbagghiu t'avieva fattu nna dumanna pricisa, pussibili c'un hai nienti ri cuntari 'nta tant'anni ri Municipiu, ca nni parri sulu ra fascia? nni vò pigghiari pi ffissa o puru fai finta r'un ci sientiri, cuomu a patri Sieriu!
- Tu m'arrispunnisti ca jera ri tri culura … e jò nvieci ti ricu, tantu p'arrifriscariti a mimuoria, ca tannu a fascia jera a ccintu; uora 'un s'usa cchiù picchì 'nta st'ultimi tiempi u spisatu addimintò nsustinibili pi mutivu ri 'sti panzuna chi jannu uora – 'nca picca picca cci nni vuonnu tri mietri – e pi chiddu chi custa jeni cchiù cumminienti chidda a tracuollu, macari picchì 'un c'è cchiù ddu bisuognu r'affigghiarila cuomu chidda a ccintu ca masinò, cuomu facievi ru pirati ti carieva. Tannu a tracuollu a purtavinu sulu i miss Italia, o tu scurdasti? Ciertu, a fascia a tracuollu 'un c'è ddubbiu ca fà cchiù fivura, pirò, javi puru u sò svantaggiu … parissi nna cuosa ri babbiari, ma chidda a ccintu jera puru cchiù difficili a nchiapparisi; uora cu chista, abbasta prisinziari a fiesta ru gilatu o ra pasta a tajanu e cuomu ti scula nna uccia ri sucu, si nni jù a fascia. 'Un sulu a malafivura … e chi fai puoi, t'à lavi? Siddu a lavi a siccu, macari e macari! … ma si nsamai Djò l'ammuogghi 'nta ll'acqua, chi nn'à ffari cchiù, 'un nna pò miettiri mancu 'nta nna chirlanna.
- Pippinu, viri ca a custioni 'un gn'jeni chidda chi ddici tu. 'Nca talè – 'un gn'jamu luntanu – talia u sinnicu, o cuomu ricinu uora, a sinnichissa ri Puoddina, tu 'un nnu viri ca l'avi siempi pulita, stirata e nova nova, e tu mu vò riri picchì? 'un ti scummiciari, tu ricu jò u picchì. Jeni l'acquaaa …!!
- Quannu vi pari l'ura, a finiti cu 'sta minchia ri fascia …! Pippinu, jò 'un l'aju tantu cu tjà picchì, vulienniti cunsiddirari, duoppu tant'anni ca purtasti, si capisci ca 'un ti nni pò rispisari, jeni Rricu chi mi prioccupa … picchì a vista l'avi buona sulu quannu vuoli iddu, cca a custioni jeni ca nuddu si nn'adduna ri cuomu nni stamu cunsumannu, ri saluti e ppuru ri sacchietta. Pippinu, 'nca tu ca sini mittutu pruopiu dduocu 'n facci, appriechiti, accussì viri ca cuomu coccunu rapi a riscussioni ncapu l'acqua – ca fussi cuosa ri rarici subitu subitu nna mmiragghia – l'autri chi fannu? si miettinu tutti a ttiesta nfunnu e fannu finta ri pulizziarisi l'ugna puoi, carmi carmi, a unu a unu, sa sfilittijnu rintra u cammarinu, picchì – parrannu ri jacqua – araciu araciu cci vannu allintannu a tutti i rrini e puoi, 'un nna putiennu cchiù trattieniri, c'hannu a ffari … vann'à ffannu jacqua!
- Pippinu, ma picchì 'un viri tu ri fari coccuosa ca si dutturi, ccà c'jeni pu mienzu a saluti pubblica, 'un babbiamu! Racci quacchi strantuluni, arruspigghili, viri ri smuoviri l'acqui!
- Rricu, ascutimi, si mancu javi nna simana chi cci fici l'analisi … cc'jeni nn'anticchiedda ri fierru supiecchiu, ma 'un vò ddiri nienti, janzi, cu jè aniemicu nni pò aviri puru giuvamientu. Nicuola, a tjà chi ti nni pari … 'nca u putabilizzaturi và cuomu un rruoggiu, i tubbazzioni parissiru …
- Pippinu, ma l'analisi a facisti ri nuotti? 'un ti nn'addunasti ca jera jacqua luorda. A Puoddina a sinnichissa javi a fascia pulita picchì a lava cu ll'acqua pulita! e uora chiuriemula cu 'sta fascia!
- 'E mè tiempi 'nta ll'acqua cc'jera l'argientu, ma pi ddavieru! 'Un si facievinu mancu l'analisi picchì jera capaci ca i strumienti stissi pi ll'analisi nfittavinu l'acqua, 'un nni custava nienti, sienza cuntari ca tutti i cannuola ri 'nte strati e di biviraturi currievinu siempi, juornu e nuotti.
- Ri 'stu passu cusà si a ccà nn'avanti 'un cci attruovinu puru l'uoru e nni pavamu i ddiebiti!
- Nicuola, tu cci babbij, u sai quantu m'addisiddirassi ri partiri ru Chianu a ppieri, cuomu si facieva nna vuota, e gh'irimi a fari nna bedda vivuta ri jacqua frisca 'nto cannuolu ra Saliera.
- E cu ti pò ddari tuortu, tu 'un ti nn'addunatu ca jò cca jaju siempi u bummuliddu chinu ri jacqua ri Ulisanu e mma cumpanaggìu pi tutta a simana; ma' scinni frisca frisca Castienziu co scusa ca và ddà a vinniri i pisci, 'un cci nni vieni nienti a ddu picciuottu … e ogni tantu cci rugnu nna cusuzza.
- Uora u sapiti ca niscieru a ddiri chidda ra risirienza … u sintistiru?
- Nicuola, chi jè nna nuvità, mai ti nn'addunatu? Jò 'gni matina pisciu calculi quantu i buttuna!
- Ma chi capistiru …? cazzi pi rramurazzi? a risirienza ntisa cuomu dumiciliu! sienza risirienza 'un putiemu trasiri mancu cchiù o Campusantu uora … cuosi, cuosi ri l'autru munnu!!
- 'Nca viriti, parrannu parrannu 'un si finisci mai ri mparari. Cu si l'avissi mmagginatu ca pi trasiri o Campusantu ri Cifalù ci vuoli a dduppia risirienza, chidda ri l'acqua e chidda dumiciliari.