- Nicuola, ma tu siempi ti rici i cuosi ri Djò?
- Nca ciertu ca mi ricu, tutti i siritini … cci mancassi jautru!
- E a matina, cuomu t'arruspigghi, puru ti rici?
- Mi stà pigghiannu pi parrinaru … nnà vuota c'agghiuorna … chi cci à ddiri cchiù!
- Viri ca i cuosi cchiù tinti succierinu pruopiu ri juornu, jò l'à vistu cu ppruova.
- Mi mittisti un pulici 'n tiesta Rricu … vuliennuci arrifriettiri, nnè ca jai tuortu!
- E mai ti nn'addunatu ca i cuosi ri Djò finiscinu siempi cu amin … tu u sai nzacchi vò ddiri, no?
- Ciertu: accussì ssia, vò ddiri … ammienu!
- E a tjà 'un ti pari nnà fuorma ri mpusizioni?
- Mma! parissi … ma picchì 'n latinu ti pari ca cala miegghiu?
- 'Un 'sta riciennu chissu, mi pari cuomu quannu u muzzicu agghiumma 'nte cannaruozza … un muccunieddu r'acqua e si nni cala lisciu lisciu, picchì 'nta ddù mumientu unu nnè ca piensa a nzacchi si sta agghiuttiennu … agghiutti e cuomu fu ffù! E 'nte riscussioni ri chissi chi ti parinu ntillittuali jeni u stissu, cci calinu quattru paluori 'n latinu e a buon locu và. Tu stacci attientu e vviri ca jeni cuomu ti ricu jò; primu nfussaru u sicilianu … ah, chi lingua! e uora stannu tintannu cu talianu e 'un vuogghiu 'un vuogghiu ca ri 'stu passu 'un nni capiemu cchiù arrieri.
- Oh, si pò ddiri ca javi ri quannu c'jera u putistà chi sugnu ccà e 'un ci à fattu mai casu; pi chissu ogni tantu ci nfilinu quacchi paluora ri latinu … pi pigghiarini pi fissa!
- 'Un gn'è siempi, ma siddu ti cci appriechi viri ca capita 'nto spissu; nca tu facci casu … quannu pierdinu u filu, o puru c'un truovinu a paluora giusta, o puru quannu sunnu 'n cunfusioni e 'un ci capiscinu cchiù nienti, primu ri fari malifivuri, chi fannu? si sciacquinu a vucca 'n latinu, macari pi ffari a ccapiri ca jannu i scuoli javuti … e cchiù gh'javuti l'hannu, chiossai cci nni ncapizzinu!
- A nuautri chi parramu 'n sicilianu … a nuostra lingua, mancu nni cachinu! S'un parrinu 'n latinu 'un si sientinu mpurtanti. Tu ta viristi assira 'n tilivisioni Baarìa … jautru chi latinu! mi stupparu aricchi e mi sintieva arrifriscari puru i purmuna cuomu quannu passiava o Baddarò! E i cumunisti, i viristi? chiddi si ca jerinu ddigni ri ssu nnomu!
- Ma picchì i fascisti, 'un nni viristi? chi jerinu cchiù miegghiu?
- Rricu, chiuriemu u riscursu ccà, 'un accuminzamu arrieri ca puoi s'appanninu i cristalli.
- Nicuola, tu ancuora 'un ti vò miettiri 'n tiesta ca l'iebbichi canciaru, canciaaaru! … tu 'un sini cummintu, si viri c'arristasti e tiempi ri Garibaldi.
- Ma picchì, sbagghiu o mi vulissi riri ca sugnu arritratu.
- Jò 'un dicu ca sbagghi, talè … quannu si ncucchinu i ficu sicchi cuomu si fà … siddu cci nn'è coccuna chi viermi si mietti ri latu, si jetta. Iddu chi fici? ncucchiò pipi e cavuli e chistu jeni u risurtatu! Ammienu avissi fattu u puonti ri Missina …
- Ma cu cci u fici fari … cci azziccammu puru tanti valantuomini, e picchì? ca quannu mi taliu … mancu u vuddicu m'arristò … mienzubustu! c'à ffari cu mmienzubustu … ah, c'à ffari?
- Miegghiu ri nienti Nicuola, ascuta!
- Tu 'un ti nn'addunatu ca a Carrubba 'un liegginu cchiù a vita a nuddu; vinti mietri prima i parrini s'accumienzinu a gnutticari a stuola, puoi sbizzìjnu anticchia r'acqua biniritta e spiriscinu zittu tu e zittu jò; nnà vuota u ncinzieri su purtavinu nzina ddà, ca sulu sulu cu ddù ciauru ri nciensu …
- Picchì jeni cuomu ti ricu jò, 'un ci sunnu cchiù pirsunalità mpurtanti cuomu nnà vuota, chi tiempi chi currinu sunnu cuomu i muschi bianchi.
'Un gn'jamu tantu luntanu, chissu ra pillicula chi dicievi antura … cuomu si chiama, Turnaturi … jeni nnà pirsuna truoppu ntilligienti! 'un nni nascinu cchiù cuomu a iddu. Jò nn'à vistu pilliculi … ma cuomu Baarìa 'un nn'asistinu 'n circulazioni! Pi ddavieru si miritava nautru Oscari. Oh, un vieru triunfu ri la sicilianità! S'av'aviri 'nto sangu … inutili!
Ca siddu cci avissi livatu ddì quattru paluori 'n talianu e ddù cumiziu cumunista ca cci vuosi nnà buonza ri jacqua pi cunchiurilu, sugnu sicuru ca nn'avissi aggangatu n'autru.
- Uora s'addivò a varba, u viristi?
- U vitti, u vitti … e sugnu cummintu ca si l'addivò appuosta cuomu sappi ca u nvitaru a Cifalù pi vinticinc'anni ru Cinima Pararisu, p'un sfivurari cu chiddi ri ccà.
- Ma jeni siempi un picciuottu simpaticu, 'un gn'jeni arijggiatu e mancu prisuntusu; nnà pruova vivienti ca quannu unu sapi jessiri umilitusu, pi fuorza ava jessiri acculturatu e ntillittuali.
Ajeri sira u viristi cuomu si l'alliffavinu tutti ra tiesta e pieri e iddu 'n sutta 'n sutta … cu ddà rrisatiedda! Parrava 'n talianu picchì ccierinu tutti l'auturità ma 'n tra r'iddu pinsava 'n sicilianu, nsumma, facieva cuomu nnà ntirpitrazioni simultania … u capisti? pinsava cuomu a nuautri e parrava cuomu a iddi … jò 'un sacciu cuomu ti l'à ffari accapiri.
- Nicuola, siddu 'un ti canuscissi … facissi mali pinsieri! Janzi, puoi cuomu siemu suli t'à parrari.
- Ma picchì cc'è ccuosa? Parra, parra libiramienti!
- Cuomu siemu suli, Nicuola. Puru ca ccà siemu 'nta quattru mura … 'un nnu viri quantu cci nn'è appinnuti … pari ca pinnichijnu! o tu scurdasti u casu Napulitanu … chiddu fà pigghia e puorta! Pari ca jè mittutu ddà, nicu nicu, 'nta dd'agnuni … st'attientu Nicuola, st'attientu!
- E allura? Macari chi ssienti jò mi nni futtu, parra … parra, 'un ti scantari!
- Jò mancu cci vulieva jri o Tiatru picchì mi cunfunnu quannu cc'è fudda, ma siccuomu ancuora 'un l'avieva vistu ri quannu fui ristavuratu e puru pi rrispiettu a Sarvucciu, sienza chi nuddu s'affienni, mi cummincìju, ma ti pari … mi sintieva ncapu i spini, cuomu si r'un mumientu a ll'autru m'avieva a scuppari 'n tiesta u lubbiuni; cuomu jsava a tiesta e taliava a ggh'jri javutu, mi parieva ca u tiettu s'annacava cuomu si jera ncapu nnà varca … mi vinni 'nta ll'uocchi quannu scuppò chiddu ri san Franciscu r'Assisi, ci piensi chi spavientu? Tirrienu fiermu Giesù Sarbaturi rissi 'n tra ri mjà e u vitti cu ppruova ca mi vuosi aiutari, picchì jò 'un nn'à fattu nienti ri mali a nnuddu … janzi! m'avissiru a vasari i pieri … su scurdaru! U Museju … jannu u Museju!
- Tu sini mprissiunatu Rricu, chissa jeni a cirvicali. 'Un mi vò ascutari … t'à mmiettiri a cuoppula!
- Tuttu summatu a cirimmuonia si pò ddiri c'arrinisciù; ma tu avievi a vviriri a chissa cunsulienti turistica, cuomu si chiama … cuomu si spiluccava tutti i capiddi e cuomu si spitticchiava l'uocchi a taliallu 'un faciennu jautru chi furriarici siempi ntunnu ntunnu.
- Ma cui, chidda ru Municipiu?
- Già, idda, idda … s'annacava ca parieva ca stava faciennu un pruvinu!
- E chi ccientra u pruvinu … macari si pirdissi a simienta!
- Ma chi capisti … u pruvinu cinimatugraficu!
- Oh, Rricu, 'un mi stunari a tiesta, tu ancuora t'appriechi 'nta cierti cuosi … tu scurdasti ca sini mienzubustu? O mi vulissi fari a ccririri … 'un nnu viri ddà a Pippinu cuomu tistìa, pari ca vulissi riri coccuosa cuomu … mma!
- Nicuola, nnà cuosa 'un pò riri ca mi manca, jò ancuora rieci riecimi jaju … rieci riecimi!!