“Se alzi le mani, t'arrienni puru tu
cristiani i fuora un ni vulemu chiù
iamu a vutari pi cu ca ci crisciù
vutamu a Saru
se vuoi libera Cifalù”

staju pinsannu ma quantu ipucrisia
quannu uora lieggiu 'sta ranni puisia
stasiatu puoi ri 'stu funnutu tiuriema
vi lieggiu l'iniziu e la fini r'un puema

“Cantu l'armi piatusi e u capitanu
ca u ran Sipulcru libirò ri Cristu.
Tantu iddu fici cu siennu e cu la manu,
tantu patjù pi lu gluriusu acquistu …

… mancu pusatu u 'nsangunatu mantu
ca vinni 'n tiempiu cu l'autri u summu duci
e ccà l'armi ripuoni, e ccà divuotu
u ran Sipulcru arura e struogghi u vuotu”

uora ca tuttu lu paisi jò finiju ri libirari
un pieri ri la sieggia mi stannu pi sirrari
ca mancu siddu avissi jutu a la cruciata
ri cuomu 'sta cammisa ci l'aju jò surata

aunni jò m'à spartiri cu ttutti 'sti cantieri
ca mi sirvissi puru a mjà un palluttulieri
sulu li cunsigghiera mu putissiru pristari
si capaci iddi fussiru cu li jrita a ccuntari

'un nnu viriti ca stà faciennu l'impussibili
pi 'nta tutti i cirimunij jò jessiri 'nvisibili
'un nni capiti ri pulitica jò vi ricu arrieri
siati cuomu a mmjà, 'un siati rispustieri

'nvieci ri jsarimi ca stà calannu 'n funnu
riciti ch'è quatrata sta palla ri lu munnu
viriti ri 'ncucchiarivi, cunsativi ssì tiesti
'un vuoli cchiù u paisi li pupi vastafiesti

i suordi sunnu picca li tiesti sunnu tanti
e ppuru mi scurdai nnà visita 'mpurtanti
spiramu ca rritarda allura u re Ruggieru
ca puru avissi iddu attraccari c'un vilieru

'un ci faciti viriri ca siemu 'nta timpiesta
sunati e abballati comu siddu fussi fiesta
ca ddù puvurieddu arriva stancu muortu
e diri jò ci avissi unni jè lu nuovu puortu

ca tannu li stanchizzi ci avissiru a passari
cuomu viri u puortu e banchini galliggiari
ma si Ddjò nni scanzi 'un cci parinu sicuri
iddu arrichiama arrieri lu Giesù Sarbaturi

stanti ca sulu a iddu uoramai può ascutari
siddu 'un Lu finiemu pi ffissa ri pigghiari
mu rissi puru 'n suonnu a ca cci pari lariu
ca vulissi canciari lu nnomu ri lu rusariu

ma siddu mi fà chista a mjà lu Sarbaturi
la banniera jò la fazzu pittari a tri culuri
pari ca ri 'sta fiesta 'un si pò ffari sienza
ca jò cu ogni mascu mi pavu nn'udienza

jappi rittu prisuntusu e puru minzugnaru
cu ddì quattru suordi ca gienti mi dunaru
jò 'n tantu già ddicisi pi futura mimuoria
l'uffierta pu Sarbaturi farila ubbligatuoria

a curpa sulu jè ra minuranza c'un si runa
e mi vinissi jmpitu ri cafuddari santijuna
siddu m'arridduciju ca cuomu jò à parrari
si 'nciruottinu l'aricchi o poustu r'ascutari

'n tantu jò vi ricu ca chiddi 'nto Cumuni
sunnu arriddutti puru a liccarisi u sapuni
e già jò urdinai puru a 'ntinna r'accuzzari
pi putiri nn'anticchia ri sapuni sparagnari

'sta fuorza mi la runa a mjà sulu Tuninu
cu ddà bedda varba, francu e cristallinu
c'avieva li sò misati ancuora ri pigghiari
ma supra i manifiesti li vuosi pubblicari

puoi ri quant'avi c'un mi parra 'n latinu
'un aju a nuddu cchiù Francu ri Tuninu
uora jò 'un sacciu mancu nzacchi a fari
si lu malluoppu l'à ddiri o l'ammucciari

a ca cu 'sta minchiata ri la trasparienza
mi vulissiru viriri cu li mutanni sienza
facitici fari u sinnicu sulu a cu ci nasci
ca jò 'nto 'n annu à strurutu già tri fasci

ma siddu mi suonnu jò quannu Simuna
mi tinjù arrieri a lavagna a dinucchiuna
'un attruovu paci e mancu cchiù risiettu
e 'un c'è nnà nuttata c'un pisciu lu liettu