Lu malu signu u vitti 'n supprincipiu
quannu acchianari vuosi o Municipiu,
a maggiuranza 'un c'iera e l'appi a fari
e allura accuminzai a stupitiari.

Tutti sietti nni mazziammu pi la Duma
ca 'n tiesta aju un bummulu c'assuma,
tannu li puotti sulu jò scumpagginari,
e tuttu picchì? Pi stupitiari!

'Un appi u tiempu ri miettimi buonu
ca primu ru lampu m'arrivò lu truonu,
'un ci fui mancu lu tiempu pi pinsari
e mancu chiddu pi stupitiari.

Pigghiai li numiri pi fari a summa
e nta li manu mi scuppiò a bumma;
cu tutti i diebiti c'aviemu à pavari
mi passò a volià ri stupitiari.

'Un sa pigghiassi siddu a prima vista
pari ca cci vulissi fari nna 'ntirvista,
sulu lu sucu a fini av'à pigghiari
'un faciennu finta ri stupitiari.

Si vossijà vuoli jò puru sta cuosa
scriviriccilla putissi puru 'n pruosa
ma lu riscursu 'un pò mai canciari
sinò finiemu pi stupitiari.

Jò m'arrivuordu c'annati nn'arrieri
accupò lu vancu ri li cunsigghieri
e pi ssà tistuzza 'un vuliri calari
'nsistieva siempi a stupitiari.

Ragiuni javi, ma chistu chi significa …
chista ieni la ranni finizza ra pulitica!
Parrari, sparrari pi puoi nienti fari
passannusi lu tiempu a stupitiari.

Ma uora vossijà 'un gn'ieni pintutu
ri tuttu lu tiempu c'aviemu pirdutu?
'Un c'ieni nuotti c'un m'aju a sunnari
cuomu puotti fari a stupitiari.

Ma siddu vossijà 'un cancia stratigia
a mali banni li sò piecuri abbìa.
Allura chi fà, piensa ri canciari?
Si!!! Uora mi miettu a stupitiari!

Nta ll'urchiestra, quannu lu sulista
sbagghiari fà o pigghiari nna svista,
la stunata 'un nna pò mai ammucciari
mancu siddu suona pi stupitiari.

'Un ci pari ca fussi cchiù miegghiu
ri parrarini siempri nto Cunsigghiu
e puoi tutti nsiemmula dilibirari
'un pierdiennu tiempu a stupitiari?

R'accussì siempi pò truvari a scusa
si 'ncuontra chiddu co pansa pilusa.
Ma quali scusi jò à gh'iri a truvari
s'un fazzu iautru chi stupitiari!

Ma cu ddu pianu, riciemu, ri rientru,
mu vuoli riri picchì 'un fici cientru?
'Un mi facissi ri sta cuosa parrari …
parieva nna cuosa ri stupitiari!

Fui l'acchianata pi mjà ri lu Carvariu
e nte carcagna puru u Cummissariu!
'Un mi facissi allura stranutari …
iautru chi rririri o stupitiari!

E chi cci nni pari s'arriva u rissiestu?
'Un nni parramu c'ancuora jè priestu;
'un gn'ieni cuosa ri cugghiuniari,
m'à 'nvintari a scusa pi stupitiari.

Puru ca lu Tarri, cu tuttu rrispiettu,
battiù 'n ritirata cuomu a Capuriettu,
'un ci piensa ca si pò arripigghiari
piscannulu arrieri a stupitiari?

Staju funniennu pi truvari la pinsata
ri cuomu fari pi firmari st'avanzata,
picchì lu Tarri pi fuorza l'à firmari
'un pirdiennu tiempu a stupitiari.

Ru puortu turisticu 'un si parrò cchiù
puru o Mantralisca lu Museu chiuriù,
sunnu sti nutizij r'aricchi attuppari,
ma la fascia cci siervi, pi stupitiari?

Stamu pirdiennu la Stradali Pulizia
e di ll'Ufficiu ri li Tassi l'Aginzia,
ma mi ricissi, nienti 'ntienni fari?
Uora … viriemu ri stupitiari.

Pi la Ruocca 'un c'è nuddu rrispiettu
e pavari mancu faciennu lu bigliettu,
piecuri e crapi ci vannu a pasculari
duoppu tant'anni ri stupitiari.

La gienti sapiri vulissi u picchì
si canta e si suona lu ntintirintì.
'Un m'à pututu li spaddi arraspari!
Cci vuoli curaggiu pi stupitiari!

La mala sorti mi capitò puru
ri jri astutari li vampi cu scuru
e s'un purtavinu l'acqua ru mari
ancuora ddà fussimu a stupitiari.

'Un aju cchiù scantu pa stati chi vieni
si nte campagni nna pampina 'un c'ieni
ma li pumpieri jò l'aju a 'mpustari
cu cirinu e cu catu a stupitiari.

A ssa talia lu scieccu c'arragghia
ieni u signali ca vuoli la pagghia!
'Un si facissi cchiù mprapucchiari
'nvieci ri ruormiri e stupitiari.

Si taliassi dd'ammienzu i capiddi.
Pi san Giluormu! Mi parinu ariddi!
Puru a mmjà a stissa cuosa mi pari,
'un c'è tiempu ri pierdiri a stupitiari.

Tannu n'Egittu succirijù o Farauni.
Ma fui picchì iddu jera minchiuni!
Chissi jannu cu mjà ccà ri fari …
Allura viriemu r'un stupitiari!

Uncà nni ficimu u juoviri rassu,
arricugghiju già l'Imu e la Tarsu,
a munnizza l'aviemu accampari?
E chistu mu chiaminu stupitiari!

Pi San Giusippuzzu ci fui u fistinu
fattu cu sfinci e viscuotta cu vinu;
'ntantu lu puopulu l'accuntintari
picchì 'un vuoli viriri stupitiari.

Uncà ci misimu a sarsa 'n sustanza
'ncapu li pizzi pi gh'inchiri a panza,
li cuosi ruci 'un faciemmu mancari
e aju u malu lausu ri stupitiari.

'Un nni parramu ra pasta a taianu
si l'accamparu chi pieri e chi manu;
duoppu un secunnu ri frittu ri mari
e ci parsiru cuosi ri stupitiari.

Pu re Ruggieru fistini e sosizza
ri tuttu ddu vinu 'un nni vippi nna stizza,
jammu a Milanu e faciemmu l'affari
e chistu vò ddiri stupitiari?

Cu li gilati ammarrammu li vucchi,
puru l'acqualuora cunsaru i cunnutti,
ri jacqua luorda nna vuccia 'un cumpari
e m'à sientiri riri ri stupitiari!

Ri nuotti e nuotti mi fici u ricursu,
pi la piscina u prugiettu jè 'n cursu,
pi lu cummierciu lu pianu app'à fari,
ci pari c'aju tiempu pi stupitiari?

Pu Tribunali quattru vuci jttai
pu cientru ri nasciti i vai sù assai,
allura a mmari m'avissi a gh'jttari
s'un fussi ca aju ri stupitiari.

Pi li turisti mittiemmu nna tassa,
u dipuraturi co mmierda c'un passa
ca puru li naschi nn'aviemu attuppari
e cci parinu cuosi ri stupitiari?

C'ieni la gienti chi vuoli rrispuosti
pi ddi quattru mura ri l'ex Puosti,
jò cci mannassi la ruspa … c'à fari?
Chianciri, rririri o stupitiari?

Puru li muorti nta lu Campusantu
l'avissi a spustari, ma aju lu scantu
ca cuomu li tuoccu mi sientu vuciari:
vattinni ri ccà, 'un stupitiari!

Jò cu rrispiettu cci ricu a vossijà
ca sta faciennu u rriviersu ri Giufà,
'un avi accussì cchiù nn'avanti chiffari
e mancu cchiù lu tiempu pi stupitiari.

Allura nna cusuzza sa mittisi ri latu
pi stupitiari nto secunnu mannatu.
Ma zzu Fifiddu … chi fà babbiari?
N'autri cinc'anni ri stupitiari!